ލ.ކައްދޫ އެއަރޕޯޓުގެ % 100ހިއްސާދާރުގެ ގޮތުގައި ރީޖަނަލް އެއާޕޯޓްސް ކޮމްޕެނީ ލިމިޓެޑް ހަމަޖައްސައިފި

ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒުގެ ވައިގެދަތުރުފަރުގެ ނިޒާމް އިތުރަށް ފުޅާކޮށް ހަރުދަނާ ކުރުމުގެ ސިޔާސަތުގެ ތެރެއިން ކައްދޫ އެއަރޕޯޓް ހިނގުން 16އެޕްރީލް 2024 ވަނަ ދުވަހުން ފެށިގެން ރީޖަނަލް އެއާޕޯޓްސް ކޮމްޕެނީ ލިމިޓެޑް (އާރުއޭސީއެލް) ކުންފުންޏާ ހަވާލުކޮށްފިއެވެ.

ރައީސުލްޖުމްހޫރިއްޔާގެ މިނިންމެވުމާއެއްކޮށް ކައްދޫ އެއަރޕޯޓްގެ %100ހިއްސާދާރެއްގެ ގޮތުގައި ދެންވާނީ އާރުއޭސީއެލްއެވެ.

ކައްދޫ އެއަރޕޯޓް އަކީ ރާއްޖޭގައި ހުޅުވުނު ފުރަތަމަ ޑޮމެސްޓިކް އެއަރޕޯޓް ތަކުގެ ތެރެއިން އެއް އެއަރޕޯޓްއެވެ.

ރައީސް ޑޮކްޓަރ މުޙައްމަދު މުޢިއްޒުގެ ރިޔާސީ ވަޢުދުފުޅާ އެއްގޮތަށް ލ. ކައްދޫ އެއަރޕޯޓް އިންޓަނޭޝަނަލް ކުރުމަށް ކުރަންޖެހޭ ކަންކަން ފުރިހަމަކުރުމަށްޓަކައި ޗައިނާގެ ސީ.އެމް.ސީ.އީ. ކުންފުންޏާއި އެކު މި ހިނގާ އެޕްރީލް މަހުގެ 11 ވަނަ ދުވަހު ވަނީ އެމް.އޯ.ޔޫ. އެއްގައި ވަނީ ސޮއި ކުރެވިފައެވެ.

ކައްދޫ އެއަރޕޯޓްގެ ހިންގުމަށް މިއައި ބަދަލާއިއެކު، އާރުއޭސީއެލް އިން ދަނީ ކައްދޫ އެއަރޕޯޓް މިހާރު ހިންގަމުން އަންނަ ކޭ.އޭ.ސީ.އެލް އާއިއެކު އެއަރޕޯޓްގެ އޮޕަރޭޝަންއާއި ހަވާލުވުމުގެ މަސައްކަތް ކުރިޔަށް ގެންދިއުމަށް ތައްޔާރު ވަމުންކަމަށް އެކުންފުނިން ހާމަކުރިއެވެ.

ކައްދޫ އެއަރޕޯޓް އާރުއޭސީއެލްގެ ދަށަށް ގެނެވުމާއިއެކު އެ ކުންފުނީގެ ދަށުން އޮޕަރޭޓް ކުރަމުންއަންނަ އެއަރޕޯޓް ތަކުގެ އަދަދު ވަނީ 8ކަށް އަރާފައެވެ.

ރީޖަނަލް އެއާޕޯޓްސް ކޮމްޕެނީއަކީ މިވަގުތު ރާއްޖޭގަ އޮތް އެންމެގިނަ އެއާޕޯޓް ހިންގަމުންދާ ކުންފުންޏެވެ. އަދި އެ ކުންފުނިން ޑޮމެސްޓިކް އެއެރޕޯޓްތަކުގެ ހިންގުން ރަނގަޅުކުރުމާއި ރެގިއުލޭޓަރީ މިންގަނޑުތައް ފުރިހަމަކުރުމުގެ މަސައްކަތް ދަނީކުރަމުންނެވެ.