މީރީ ޕްރޮޖެކްޓުން އެންޓަޕްރެނާސް އަށް ވެބިނާ ސީރީޒެއް ފަށައިފި

މީރީ ޕްރޮޖެކްޓުގެ ފަރާތުން އެންޓަޕްރެނާސް އަށް ލައިވް ވެބިނާ ސީރީޒެއް އިއްޔެ ފަށައިފި އެވެ.

ޒުވާނުންގެ މެދުގައި އަމިއްލަ ވިޔަފާރިކުރުމުގެ ތަޖުރިބާ އަދި ހުނަރު ބަދަލުކުރުމުގެ ޕްލެޓްފޯމު ގާއިމްކުރުމުގެ މަގުސަދުގައި ކުރިއަށްގެންދާ މި ވެބިނާ ފައްޓަވައިދެއްވީ ހަޔަ އެޑިއުކޭޝަން މިނިސްޓަރު ޑރ. އިބްރާހިމް ހަސަނެވެ.

މިއީ، ހަޔަ އެޑިއުކޭޝަނާއި އިކޮނޮމިކް މިނިސްޓްރީ ގުޅިގެން ވޯލްޑް ބޭންކުގެ އެހީގައި ފަސް އަހަރަށް ގެންދާ 20 މިލިއަން ޑޮލަރުގެ މަޝްރޫއެކެވެ.

ކޯވިޑު-19 އާ ގުޅިގެން ވިޔަފާރިތަކަށް ބޮޑެތި ގެއްލުންތަކެއް ވެފައިވެ އެވެ. އެކަމުގައި އެހީތެރިކަން ދިނުމަށް "އެންޓްރަޕްރެނާސް ލައިވް" ގެ ނަމުގައި ތަފާތު ދާއިރާތަކުގެ ވިޔަފާރިވެރިންގެ ތަޖުރިބާ ހިއްސާކުރުމާއި މައުލޫމާތު ބަދަލުކުރުން ހިމެނެ އެވެ. އޭގެ ހަތަރު ސެޝަނެއް ކުރިއަށްގެންދާނެ އެވެ.

މިނިސްޓްރީން ބުނީ މީރީ ޕްރޮޖެކްޓުގެ ފަރާތުން ރާވާ އިންތިޒާމްކުރާ "ޕިޗް-އަޕް: ޔޫތު އެންޓްރަޕްރެނަޝިޕް ޗެލެންޖު" ތައާރަފުކޮށްފައިވާ ކަމަށެވެ. އަންނަ ހޯމަ ދުވަހު ފަށާ މުބާރާތުގައި އާ ވިޔަފާރީގެ އުފެއްދުންތަކާއި ހިޔާލާއި ވިސްނުންތައް ހުށަހަޅައި އެ ކަންކަން ފެށުމަށް ޒުވާނުންނަށް ބޭނުންވާ މާލީ އެހީތެރިކަން ދޭނެ އެވެ.

ޓެކްނިކަލް ވޮކޭޝަނަލް ދާއިރާ އާއި ވިޔަފާރީގެ ހުނަރުތައް ތަރައްގީކުރުމަކީ ވެސް މި ޕްރޮޖެކްޓުގެ އެއް އަމާޒެވެ. މީރީ އިން އިސްކަންދޭ ދާއިރާތަކުގެ ތެރޭގައި ޓޫރިޒަމާއި އެކަމާ ގުޅޭ އުމްރާނީ މަސައްކަތާއި އައިސީޓީ އަދި ދަނޑުވެރިކަން ހިމެނެ އެވެ.