ހަނިމަދޫ އިންޓަރނޭޝަނަލް އެއަރޕޯޓް ތަރައްގީކުރާނެ ބަޔަކު ހޯދަން ހުޅުވާލައިފި

ހަނިމާދޫ އިންޓަނޭޝަނަލް އެއާޕޯޓް ތަރައްގީ ކުރުމަށް ޝައުގުވެރިވާ ފަރާތްތައް ހޯދުމަށް އިންޑިއާގެ އެކްސްޕޯޓު އިމްޕޯޓު (އެގްޒިމް) ބޭންކުން ހުޅުވާލައިފި އެވެ.

ހަނިމާދޫ އެއާޕޯޓް ބޮޑުކުރުމުގެ މަޝްރޫއަކީ އިންޑިއާ އިން ރާއްޖެއަށް ދޫކޮށްފައިވާ 800 މިލިއަން ޑޮލަރުގެ ލައިން އޮފް ކްރެޑިޓުން ހަރަދުކޮށްގެން ކުރިއަށްގެންދާ މަޝްރޫއެކެވެ.

އިކޮނޮމިކް މިނިސްޓްރީން ނެރުނު ނޫސްބަޔާނެއްގައި ބުނީ، ހަނިމާދޫ އެއާޕޯޓު ތަރައްގީ ކުރުމުގެ މަޝްރޫއުގެ ބީލަން މަރުހަލާގެ ފުރަތަމަ ހަރުފަތް ކަމަށްވާ ކޮންޓްރެކްޓަރުން ޕްރީކޮލިފައި ވުމަށް އިންޑިއާގެ އެކްޒިމް ބޭންކުން މިއަދު ހުޅުވާލާފައިވާ ކަމަށެވެ.

އެ މަޝަރޫއުގެ ދަށުން ހަނިމާދޫގައި 2460 މީޓަރުގެ ރަންވޭއަކާއި 111،000 އަކަފޫޓުގެ ޒަމާނީ ޓާމިނަލެއް ތަރައްގީކުރުމަށް ވަނީ ހަމަޖެހިފަ އެވެ. އަދި 624،000 އަކަފޫޓުގެ އޭޕްރަން އަކާއި ބައިނަލައަގުވާމީ ދަތުރުތައް ފުޅާކުރުމަށް ބޭނުންވާ އެހެނިހެން ވަސީލަތްތައް ގާއިމުކުރާނެ ކަމަށް ވެސް އިކޮނޮމިކް މިނިސްޓްރީން ވަނީ ބުނެފަ އެވެ.

ހަނިމާދޫ އިންޓަނޭޝަނަލް އެއާޕޯޓު ތަރައްގީ ކުރުމުގެ މަޝްރޫއުގެ ދަށުން އޭ320 އަދި ބޮއިންގް 737 މަރުކާގެ އުޅަނދުތައް ޖެއްސޭ ވަރަށް އެއާޕޯޓުގެ ރަންވޭ ދިގުކޮށް ޓާމިނަލްތަކާއި ފިއުލް ފާމްތައް އަދި ފަޔާ ސްޓޭޝަނާއި ކާގޯ ޓާމިނަލްތައް ތަރައްގީ ކުރާނެ އެވެ.

ރާއްޖެ އާއި އިންޑިއާ އިން 800 މިލިއަން ޑޮލަރުގެ ލައިން އޮފް ކްރެޑިޓް އެއްބަސްވުމެއްގައި ސޮއިކުރީ ރައީސް އިބްރާހީމް މުހައްމަދު ސޯލިހު 2018 ގައި އިންޑިއާއަށް ކުރެއްވި ރަސްމީ ދަތުރުފުޅުގައެވެ.