ބޭރުގެ ކުންފުނިތަކަށް ތިލަފުށިން ބިން ދޫކުރާނީ އެފްޑީއައި ހުއްދަ އޮވެގެން: އެޗްޑީސީ

ބީލަމުގެ އުސޫލުން ސިނާއީ ބޭނުމަށް ތިލަފުށިން ބޭރުގެ ކުންފުނިތަކަށް ބިން ދޫކުރާނީ ސަރުކާރުގެ ފޮރިން ޑިރެކްޓް އިންވެސްޓްމަންޓް ޕޮލިސީ (އެފްޑީއައި) ގެ ދަށުން ހުއްދަ ދޫކޮށްފައިވާ އަދި ރާއްޖޭގައި ރަޖިސްޓްރީކޮށްފައިވާ ކުންފުނިތަކަށް ކަމަށް އެޗްޑީސީން ބުނެފިއެވެ.

ތިލަފުށިން 150 ހެކްޓަރުގެ ބިން ހިއްކުމަށް ނިންމައި އެ ބިމުގެ ތެރެއިން 4.3 ހެކްޓަރު (ވަކި 50 ޕްލޮޓުގެ ގޮތުގައި) ބީލަމުގެ އުސޫލުން ދޫކުރުމަށް އެޗްޑީސީން އިއުލާނުކުރީ މި މަހުގެ 7 ވަނަ ދުވަހުއެވެ.

އެޗްޑީސީން ބުނީ ބޭރުގެ ކުންފުނިތަކަށް ބީލަމުގައި ބައިވެރިވެވޭނީ އެފްޑީއައިގެ ދަށުން ހުއްދަ ދޫކޮށްފައިވާ އަދި ރާއްޖޭގައި ރަޖިސްޓްރީކޮށްފައިވާނަމަ ކަމަށެވެ.

އޭގެތެރޭގައި ޕްރޮޖެކްޓް ބޭސިސްގައި ކޮންސްޓްރަކްޝަން މަޝްރޫޢުތައް ހިންގުމަށް ހުއްދަ ދެވިފައިވާ ކުންފުނިތަކަށް ބީލަމުގައި ބައިވެރިނުވެވޭނެ ކަމަށް ވެސް އެޗްޑީސީން ބުންޏެވެ.

ބިން ކުއްޔަށް ނެގުމަށް ހުށަހަޅާ ބޭރުގެ ކުންފުނިތަކަށް ބިން ބޭނުން ކުރުމަށް ހުށަހަޅާފައިވާ އިންޑަސްޓްރިއަލް ބޭނުންތަކަކީ އެ ފަރާތްތަކަށް އެފްޑީއައި ޕޮލިސީގެ ދަށުން ހުއްދަދެވިފައިވާ ވިޔަފާރި ބޭނުންތަކެއްތޯ އިކޮނޮމިކް މިނިސްޓްރީ މެދުވެރިކޮށް ވެރިފައިކުރާނެ ކަމަށް ވެސް އެޗްޑީސީން ބުންޏެވެ.

އެޗްޑީސީން މީގެކުރިން ބުނި ގޮތުގައި ތިލަފުށިން އަލަށް ހިއްކަމުންދާ ބިމުގެ 90 ޕަސެންޓު ބިން ޚާއްސަކުރާނީ ދިވެހި ވިޔަފާރިތަކަށެވެ.

ބީލަން ކާމިޔާބު ކުރާ ފަރާތަކީ ދިވެހި ފަރުދެއް ނުވަތަ ދިވެހި ކުންފުންޏެއް ނަމަ ބިން މިލްކުވާނެއެވެ. ނަމަވެސް ބީލަން ކާމިޔާބު ކުރާ ފަރާތަކީ ބޭރުގެ ފަރުދެއް ނުވަތަ ބޭރު ކުންފުންޏެއް ނަމަ ބިން ދޫކުރާނީ 99 އަހަރަށް ކުއްޔަށެވެ.