ރާއްޖޭގެ ޑޮމެސްޓިކް ފަތުރުވެރިކަން ހުޅުވާލުމުގެ މަސައްކަތް ކުރަނީ

ރާއްޖޭގައި ޑޮމެސްޓިކް ފަތުރުވެރިކަން ހުޅުވާލުމަށްޓަކައި އަންނަ މަހުގެ ތެރޭގައި ކަމާގުޅޭ ފަރާތްތަކާއި މަޝްވަރާކުރާނެކަމަށް ޓޫރިޒަމް މިނިސްޓަރ ޑރ. އަބްދުﷲ މައުސޫމް ވިދާޅުވެއްޖެއެވެ. ޓޫރިޒަމް މިނިސްޓްރީން ކަނޑައަޅާފައިވާ ގައިޑްލައިންގާވާގޮތުން މީހުން ދިރިއުޅޭ ރަށްރަށައްދާނަމަ 10 ދުވަހުގެ ކަރަންޓީނެއް މިހާރު ފުރިހަމަކުރަންޖެހެއެވެ.

ރާއްޖޭގައި ޑޮމެސްޓިކް ފަތުރުވެރިކަން ހުޅުވާލުމާއި ބެހޭގޮތުން ޓޫރިޒަމް މިނިސްޓަރ ޑރ. އަބްދުﷲ މައުސޫމް ވިދާޅުވީ، މިއީ ރާއްޖޭގައި ޑޮމެސްޓިކް ފަތުރުވެރިކަން ފަށަންވީ ވަގުތުކަމަށެވެ. މިއީ އިޖްތިމާއީ ގޮތުންނާއި އިޤްތިޟާދީގޮތުންވެސް މިވަގުތައް ބޭނުންތެރިކަމެއްކަމަށެވެ. އަންނަ މަހުގެ ފުރަތަމަ ހަފްތާތެރޭ ރާއްޖޭގައި ޑޮމެސްޓިކް ފަތުރުވެރިކަން ހުޅުވާލުމާއި ބެހޭގޮތުން ކަމާގުޅުންހުރި ފަރާތްތަކާއި މަސްވަރާކުރައްވާނެކަމަށް މިނިސްޓަރ ވިދާޅުވިއެވެ. ޑޮމެސްޓިކް ފަތުރުވެރިކަން ހުޅުވާލިނަމަވެސް އެކަންކުރާނީ ސަލާމަތާއި ރައްކާތެރިކަމުގެ ގޮތުން އަޅަންޖެހޭ ފިޔަވަޅުތައް އަޅައިގެންކަމަށް މިނިސްޓަރ ވިދާޅުވިއެވެ.

ޓޫރިޒަމް މިނިސްޓްރީން ރާއްޖޭގެ ގެސްޓްހައުސްތައ ހުޅުވުމުގެ ހުއްދަ ދީފައިވަނީ އޮކްޓޯބަރ މަހުގެ 15 ވަނަ ދުވަހުއެވެ. މިނިސްޓްރީގެ ތަފާސްހިސާބުތައް ދައްކާގޮތުން މިހާތަނަށް ރާއްޖޭގެ 264 ގެސްޓްހައުސްއެއް ހުޅުވުމުގެ ހުއްދަ ވަނީ ދީފައެވެ. ރިސޯޓްތައް ހުޅުވުމުގެ ހުއްދަ މިދިޔަ ޖުލައި މަހު ދީފައިވާއިރު މިހާތަނަށް 141 ރިސޯޓެއް އަންނަނީ އަލުން އޮޕަރޭޓްކުރަމުންކަމަށް ޓޫރިޒަމް މިނިސްޓްރީގެ ތަފާސްހިސާބުތަކުން ދައްކައެވެ.